[Zeugenaussage für Peter Dampfrion]

Item hat geseit Hanns Aman der Messersmit dz er wol wisse als von

des kessels wegen so da wer in Waldemburgin hus under den gerbern

dz derselb kessel der genan Waldemburgin wer und welti Hanns Strube

der gerber denselben kessel kouffen als nü aber diser zuge der genan Walden-

burgin und irer tochter vogt wer do so hette er dem genant Struben

den kessel für x lib gebotten, und im darzü acht tage zyl geben

[Rand: und wer er besser so solte er me darumb geben den er worhin

xvii gl gecostet hette] sich der uff nemen (?) ze bedenken, also hette der genan Strube den kessel

koufft fur x lib und wer dz es besser wer dz er me darumb geben solte

one fürwort, und sie solicher kouff umb den kessel beschehen [Einschub: drie fronfasten] vor und

ee dz hus Waldemburg gefrönt oder verkoufft würde, und habe im

der genan Strube an solichem kouff iii lb geben und sie dz ubrig

noch schuldig und darzu sie er noch ii fronfasten zinses schuldig

tünd v gulden die ouch gevallen werent vor und ee dz hus gefrönt (...)

und wol wisse diser zuge dz die alte Waldemburgin one dis zugen

wissen und geheisse zu iegklichen molen, dem genan Struben so er ye

das hus von ir empfangen, einen gulden oder i gulden geschenckt habe.

ad idem

Item hat geseit Clor Hasenen dz ir wol indenck sie dz Hanns Alman

uff ein zyt zü ir keme als man uff der Waldemburgin sinen vogt

frowen hus understand hette ze faren von versessener zinsen wegen

und hette zü ire geredt wie rotent ir wir brechent den kessel

uss der costet wol xiiii gulden und verkouft den und bezale damit

ander denen man schuld ist, den solte das hus bezogen und der

kessel darinn finden werden so möchte man umb den kessel kom.

Also hette es dis zugen geraten beduht dz man in usbrechen

und verkoufen solte, darnah so hette Hans Aman und Strube

der gerber miteinander uff einen sundtag deshalb einen tag

gesetzt, uff denselben tag kouffte ouch Hanns Strube den kessel für

x lib d also er solte den kessel usbrechen wer sache dz er besser

wer so solte er me darumb geben wer er swecher so solte er

minder darumb geben, und gebe Strube dem genan Hansen

Aman dazümol uff solichen kouff iii lib d und beschehe

der kouff wol iii fronfasten vor und ee dz hus gefrönt wer

und von bitt wegen des genan Struben liesse man im den kessel

also unusgebrochen im huse bliben.