Ich Moritz Hurgraber bekenen und thun kund aber mengcklichen

mit disem brieff das ich bin im Bickerdy gesin und ist min bursgesel

gesin der ersam Hans Waltispuel und hat sich zutragen das er gestochen ist

worden von dem Melcker Husenstein säligen und mächtig kranck worden

do man abstat zogen sit ist Peter Kurman zu mir komen und Hansen

Buob von Mentznow die sind zuchen gestanden und in gefründett

und gesprochen wir wend dich nit da hinden lon und dich uff ein

molitzyon wagen legen und mit eim buren oder fuorman über ein

komen das sy im hand gen ein halby kronen und in uff den

wagen geleitt nachen zu füren do ist Peter Meili ein büchsenschütz

gesin und in der vorhuot und könt nit wüsen das sy mit kein

wort nie mit im uneins gesin sige ouch ist Hans Wärdenstein der in

des lasters zogen hat nitt in dem zug im krieg nienen gesin und

ist also Hans Waltyspul da hinden beliben ist das geschrey gesin

der wagen sig zerbrochen und hab in der wal lasen ligen

das bezügen ist uff min lid, und sel sälikeit vor dem geschwornen

weibel der hoffen zu Sickigen [im ampt Rottenburg] dan mir an eim schänckel ettwas ist

wider faren das ich nit wandlen mag uff den 4 tag weinmonet.