Fyrsichtigenn ersammen wyssen gnedig und günstigen

herren uff k k ir beger ein radtschlag ze

vervassen dem wucher belangenn, haben wir noch

volgenden als die gehorsammen (?), uff verbesserung

unser gnedigen herrenn verfasset.

So die liebe alle gebodtt ussleyt, achten wir dass nit

alle ynnemmung yber das hauptgutt wucher sye

uber die so zu wider der lieb, mit mercklichem schaden

des bezalers geschehenn, so ein onglicheneitt gefunnden

wurdt, zwischen dem kouffer unnd verkouffer

dan wiewol zu vor dass genzig onbarmhertzig herz

ein wücherer macht vor Gott, inn vilem oder wenigem

so ist doch solchs allein dem urteil Gottes befolhen

der die urteil allein erkennet, die ober hant aber

nümpt sich der kusserlichen (?) onbillikeit ann.

Zum erstenn herrenn zyns, zehend, grunnd oder boden

zins, eigenschafftenn in verlihens oder verdingens

wiss syndt hie onbegriffenn.

In gelt zinsen achten wir iörlich von zwenzig gulden

oder lib eins mit Gott wol syn.

In korn unnd win guldten wu myglich undt wer

das korn unnd win gulder gannz abgesteltt unnd in

gelt zins, von zwenzig einen, gewendt, noch ludt

zyrcher ordnung die also stadt.

So den belangende die kernen, haber, rocken, weyssen

unnd win guldt, unnd zins, so umb gelt verkaufft

unnd verbriefft sindt, gebiettenn unnd verbietten wir

das niemant der unseren es sygind geistlich oder

weltlich personen, frowen oder man rich oder arm

(2)

hynfyro kein korn, habern, roggen, weissen, oder

win gulte, nummer mache, kouffe nach anlege

und mit nemmen, wo vorneher (?) solche zins koufft

unnd gemacht werend, das fyrterhin die selben

frucht nit mer, sonder allein gelt dar fyr geben

unnd genommen werden soll, unnd also den

houptgudt noch als von zwenzig gulden, oder

pfunden ein gulden oder pfundt, unser statt

zurich muntz unnd werschafft, gezinset werden

unnd ein yeder gebruchliche lossung noch dem houpt

gudt dar zu haben.

Disser zurcher ordnung streckt sich uff die frembden

unnd heimschen.

Auss solchem mechte einer gemein vil guts widerfaren

bessren korn unnd win markt unnd das land minder

beschwerdt.

Wo aber zyrcher ordnung einer statt Basel umb

der gelegenheitt willen nit gemess, sonder beschwerlich

so haben wir ander mittel als wir achten lydlich 

aller billikeit gemess bedecht.

Erstlich, das man einen gemeinen schlag mächte, als

zwenzig pfund mer oder minder, umb einen soum

wins, oder vierzel korns do mit durr unnd

welfeile ior verglichen wurden.

Zem anderen, die wil korn unnd win gylt uff

korn, oder rebäcker underpfand gemacht werden,

dass uff ein gudt, oder acker, so vil unnd er werdt

gelyhen wurde oder so vil, als do mit er möchte

verkoufft werden, unnd dem verkouffer umb den

funfften oder sechsten sester, noch gelegenheitt diss

guts verlyhen mit ynbindung dass gut, in gutem

baw zehalten, wuchs vil so hette der kouffer

(3)

vil, wuchs wenig, so hette er wenig, wyrde kein

teyl beschwerdt, wer ouch Gottlich.

Zum dritten man gebe xii oder xv lib fyr ein

fierzel korn, oder soum wins, noch dem hochgyltigsten

korn oder win kouff, so plibdt dem kouffer zum licher

gewun, vonn gelt zins, aber fyr den abzug des

der korn oder win halten wil, unnd dess zins korn

unnd win, geringer geachtet, item fyr messer unnd

wender lon, werde dem lehenherren gegundt, die

korn unnd win zins, on wider endtgeltnus einze-

nemmen, so lang biss das korn ein pfundt, der

soum wins ein gulden gelten wyrde, wo aber

korn oder win im gelt uffstige yber gemelts gelt,

das als dan der lehen herr, entweders ein pfundt

fyr ein vierzal korns, ein gulden fyr ein soum

wins neme, oder aber sovil das korn yber ein lib

und der soum wins yber i gulden verkoufft wyrde

dem bawherren heruss gebe, unnd wurde der schlag

gemacht ongeverlich vierzehend tag vor oder nach

Sant Martin tag, nit zem höchsten auch nit zem

nidersten. Solchs möchte wol geduldet werden

als christenlicher lieb gemess unnd nit zuwider.

(4)

Korn unnd win

kouff belangen

xiii