Als dann furkompt, das die muller den fro [unleserlich] am

kornn kouffen, inn den herbergenn unnd sunst inn der

statt, unnd uff dem konrmarkt, im Richthus korn

kouffenn, oder zekouffen bestellenn, uber das sollichs

ir ordnung, die sy dann zehalten geschworn habenn,

verbuttet, da lasst inenn unnd ir ieglichem insonder

ein ersamer Rat sagenn, unnd by irem geschwornnen

eyden gepietenn, das kein muller keinem frömbden

einich korn wder inn den husernn, noch inn den

herbergenn, noch uff dem konrmarkt, inn dem Richt-

hus noch sunst an keinen anndern ennden kouffen

bestellen noch red darumb haltenn, noch einiche

anzeig thun, damit den frombdenn sollich korn

verkoufft werde, unnd das die muller den frombden

kein kornn renndlenn söllen, alle wil sy den

burgern ze malenn habenn, inn kein wyss, dann

wllicher sollichs wyter verpricht, der würt als

umb einen mein eyd gebessert.

Sodann als sy die muller inn dem Richthus mit

iren melbigenn seckenn sich inn den huffen

under die lut mischenn, da ist eins ratz meynung

das sy sollichs mydenn, unnd an einen

ort usserthalb den lutenn, by einandern stann,

unnd irer kundenn warten söllenn.

(2)

Den kornmessern lasst man ouch sagenn, unnd by

iren eydenn bim hochstenn gepietenn, wann die

frombden sy berüffenn, inen kornn zemessen, das sy

dann by denselbenn iren eydenn keinem frombden

messen söllenn, inen sye dann das schouw kornn

zuvor uberanntwurt, unnd das der selb frombd by

dem eyd siner oberkeit getann zuvor behaltenn toige,

das sollich kornn inn dem richthus, uff offnem korn-

markt unnd sunst ussertalb an keinen anndernn

ennden, erkoufft unnd ouch kein annder kornn sye,

dann das so dem schouwkornn noch verkoufft, unnd

im uberanntwort ist, dann wann ein kornmesser

vernympt, oder das die fromden sollich obgenannt

behaltenn nit täte, so sollen die kornmesser by

iren eydenn, dasselb kornn nit messen, doch die

kornn casten vonn kornn wissenn unnd habernn,

so yetzo inn unnser statt geistlich unnd weltlich

habenn, oder hinfur sin werdenn, hierinn vorbehalten.

Es sollen ouch die kornmesser, aber by irenn eydenn,

den frombden kein korn messen, unnser burger syen

dann zuvor gevertigt, unnd ir kornn gemessenn,

als dann ein burger oder hindersäss käme, unnd

begerte vonn dem kornn, so der frombd, ann dem

konrmarkt koufft, unnd zemessen ervordert, im

teil oder ganntz zülassenn, derselb teil oder das ganntz,

sovil unnser burger oder hindersässen zenemen werden

erfordernn, soll inen vervolgenn on widerred,

des frombden, doch umb den pfennig, wie dann der

(3)

fromb dasselb kornn erkoufft hat, wo aber die

frömbdenn den unnsernn sollichenn teil wie vorstat

zelassen versagenn, so sollenn die kornmesser

demselbenn versagernn, by irn eyden nit messen,

bis das sy den unnsern den annteil inmassen vorge-

lutert ist, habenn volgenn lössen, unnd welicher

kornmesser der stuckenn eins verpricht, der soll als

umb einenn meineyd gstraft werden.

Dis erkanntnis ist inn dem xvi iar beschehen.

Anno xvii mittwochen vor Luce, alsdann zu

diser zit, inngerissner kornthurenn, mengclichem

grosre clam am kornn zügestanndenn, da notwendig

ist, fruchtpar insechung zetünnd, dardurch die unsern

zu gepurenndem kornnkauf komenn, deshalb haben

unnser herrn beid rät (irem kornmarkt inn

zimblihcem wäsen erenn unnd wurden zeenthalten)

furtrachtrachtlich erkannt geordnet, unnd gesetzt, dis

nachvolgennd meynung.

Des erstenn, als wir unnsernn burgern und hindersassen

(4)

hievor bewilligt unnd zuglossen habenn, uff ein oder

zwey iar kornn zu irm gepruch mögenn, in kouffen,

damit dann der furkouff inn sollichem abestrickt

unnd menngclich deshalb vor schadenn gewarnnet

sye, so wollen wir unnd ordenen, das unnser

burger unnd hindersäsen, ir kornn, so sy hie inn der

statt oder usserthalb unnd innerthalb acht myl

wegs schybenwys umb die statt, zu irm gepruch

also erkouffenn, inn irnn zuseren, mit irm gesind,

selbs nutzenn unnd niessen, unnd das keins wegs

verkouffen söllennd, by verlierung desselben

irs kornns.

Unnd damit unnser kornmarkt vonn den

furkouffernn unnbelestiget blibenn, unnd unsere

burger unnd hindersäsen, zu zimblichen kornkauf

komenn, so wollenn wir das keiner unnser burger

noch hindersäss uff merschatz inwenndig acht myl

wegs schybenwyss umb unnser statt korn inkoufen

soll, ouch by verlierung irs erkoufften kornns.

Ob aber die frombden uns mit vorwannd ussertalb

unnser statt, unnd innwendig dem bezirk der acht

myl wegs uff merschatz woltennd kornn koufen,

das by unns veilhabenn, wider verkluffen, unnd

daran gewynnenn, das lassennt wir beschehen,

doch also, wurdenn sy dasselb ir kornn by unns

unnd ann unnserm konrmarkt, des erstenn märkts

so sy das veilhannd nit verkouffenn, so wollen wir

(5)

nit gestattenn, das sy sollich ir kornn by unns instöllen

sonnder sy mit irm korn, so sy uff merschatz wie

oblut hergfürt, unnd nit verkoufft hettennd us und

vonn unnser statt wider heimwysenn.

Was kornns aber den frombdenn oder heimschenn

an unnd uff irem eignenn oder empfanngnen gütern

wyt oder noch glegenn, erwachset, unnd sy erbuwen,

das sy zu unnsterm märkt furenn werdenn, unnd

doch nit verkouffen, das mogennt sy by unns ob

sy wollennd, wol instöllenn, unnd zu anndernn

zytenn des märkts, noch irm gfallenn uff unserm

konrmarkt veilhabenn, unnd verkouffen.

(6)

Uff fritag vor Jubilate anno xvi

uff der stägenn gegenn dem markt

ist wie nochvolgt gerüfft wordenn

Liebenn hernn unnd gutenn frund, damit unnd der

kornnkouf inn zimblichem wasenn gehaltenn unnd

der winckelkouf inn demselbenn abgestölt, unnd

deshalb güt ordnung, wie vonn altar har komen, gehalten

werd, so habenn unnser hernn rat unnd meister

angsehenn erkannt und geordnet, ouch das mengclichem

heimschenn unnd frombden lassenn verkundenn

unnd sagenn, das mengclich der korn zu märkt

unnd vilen kouff harfürt, das der unnd dieselben,

mit irm kouffenn unnd verkouffen, sollich ir

veilkornn zu unnd inn der stund, als mann bishär

vonn altem sollichenn märkt gehalten hatt, veil

tragenn unnd verkouffenn söllen, unnd mögenn,

namlich wann es inn unnserm richthus acht

uren geschlagen hatt, annzefahenn, unnd bis uff

endung derselbenn stund oder lenger ungefarlich,

wie dann derselb märkt eins yedenn tags sich

enden wurt, denn wer der were, der usserthalb

gedachter stund, ann dem obenn oder morgenn

sollich kornn oder habernn kouffte, oder verkouffte,

vonn denselbenn kouffernn unnd verkouffernn,

wurt vonn yeglichem, so dick das bschicht, fünnff

pfund stebler unablässlich zu rechter peenn gnomen

werdenn, darnach wiss sich mengclich frombd

unnd heimsch zerichten.

(7)

Nachgonnde erkanntnus ist inn der zunfft

zegebenn bevolhenn, doch mitler zit

ettwas ingfallenn, das damit geheissen

stillzestann, unnd also blibenn unver-

kunt anstan.

Unnser herrn beid nuw unnd alt rät lannd mengclichen

ernstlich gepietenn, sagenn unnd warnnen, das hinfur

niemands er sig geistlich weltlich eder unedel

burger hindersass muller kornmesser wurt

manns oder wybs personenn, niemannds usgesonndert,

keinem frombdenn unnd uslenndigen kein korn

rockenn weissen noch habernn, weder ann offnem

markt, inn den castenn, noch allenn anndern enden (?)

nit kouffen, bestollen, dingenn, oder einiche red

deshalb darunder habenn, sonnder sollich fromb

unnd uslendige, noch lut der ordnung am offnen

unnd fryen markt selbert personnlich kouffenn

lassen söllen.

Es soll ouch niemannd wie obstat keinem frombden

unnd uslenndigenn, so kornn rockenn weissen

oder habernn hiehar inn unnser statt zuverkouffen

fürt, unnd ime ettwas unverkoufft uberblibt

dasselb uberblibenn gut, ganntz oder zum teil nit behalten

behusenn beherbergenn, noch hindersich stöllen,

sonnder einenn yedenn sollich sin uberblibenn güt

widerumb heim füren lassen, unnd so einer oder

der annder, dis unnser gepott unnd warnung uber-

tretten, unnd furgann wurde, den oder dieselbenn

werdenn unnser hernn ernstlich noch eins yeden

schuldenn unnd verdienen, onn einich gnad, darumb

straffen, heinach wiss sich menglich zürichten

actum den xxiii sten augusti anno xxvi