Item Claus Rieher der Ferwer hat by sinem geswornen eide geseit

wie sich um sant gallen tag in dem lxxiii ior gemacht dz er

uff de merkt zu Mulhusen gewest da selbs sye Hanns Aman

zu im komen und im dargezelt ein pfunt dry schilling basler pfennige

und geseit wie Jörg Odeltzhein im die an sin schuld geschikt

habe, dem nach und ettwaz me dan vor ein ia ungeverlich

sye der selb Hans Ammann har in die statt Basel fur sin

hus komen und im aber dargezelt i lib dry ß von des gedachten

Jörge Odershein wegen, und da by geseit, das er im die och

an sin schuld geschickt habe. Er habe aber weder tüchlin noch luder

lin darinn dz gelt gelegen sin sölle nit gesehen sunder habe im

sölich gelt zu beiden malen uss sinder hand dargezelt und als er

im dies letst gelt dargezalte spreche er nemlich Hans Amman

zü im disem gezugen ob er im ettwaz schenken, welte er im noch

eins guldin wert geltz von sintwegen geben wer sin anttwurt

welte er im die schuld gantz geben die sich by xi lib ungeverlich

getroffen welte er im gern ettwaz schenken aber sust nutzit uff

dz redten Amman fur nein er lihe im solich gelt yetz

dar und wiste nit ob im dz wider wurde oder nit so vil

und nit ander wer im hie von ze wissen.