Her schulthes gnädigen wisen lieben heren. Es ist einer
von Zoffingen genant Mathis Brun wirt zum ochsen,
zu Wolhusen gsin, und als er in drinck ist komen
hett er ettwas wortten uss gestossen, wie dan hie nach
volgen wirt, in dem selbigen glich darnach sind die
eren vesten und wysen herren her stattvender und
houttman Kloss gan Wolhusen komen, sind inen sämliche
wort fürkhomen, hand sy dem wybel Moritzen, bevolchen
due khuntschafftter nach form rächtes zu verhörren, und
dan der kuntschafft sag üch unsern gnedigen herren und
obren zu zeschriben, das nun beschechen. Un dzügt
zum ersten Claus Scharers frow Hanns Murers frow
Kasper Husmans frow, und Hanns Meyer der beck,
namlich zügen die frowen all glich, wie das gemelter
Mathis Brun angefangen, und grett, wie stats umb
üwer kriegslütt die frowen antwurtten wir wüssens nit
aber dencken wol, do rett er zu Kasper Husmans frowen
din man kumpt niemer mer heim, dan sy sind mer dan
halb erschlagen unnd die andren sind gflochen, und handt
wenig eren in geleytt, rett witter ia üwer houptlüt
sind auch fast umbkhomen, und legen ghein er [Ehre] in, sunders
schaffent nüt anders dan blutt vergiessen, und machent fil
wittwen und weissen, das ist die er die sy in legen.
Er sprach ouch der uwern sind fil mer uff der waldstatt
bliben dan der figenden, das zügendt die frowen, unnd
Jacob Meyer zügt ouch glicher gstalt, dan by der ersten
an frag ist er nit gsin.