1602.12. apr.
Edler, Vester, Gnediger, vnd Gebiettender Junckher [E. v].
seyendt vnsere vnderthenige, gehorsame, dienst zuvor etc.
Gnediger Junckher, Demnach E. v. aus befelch vnsers
gnedigen fürsten vndt herren etc. Claussen, Hanssen, vndt
Waltern Metzger, den Vatter vnd die Zwey Sün von Stein-
enstat in verhafftung vnd gefangenschafft genomen, Ursachen sie
bey ihr fürstlichen gnaden verklagt, als ob sie mit ungerechten sachen
ihren Artzney halben vmb gehn söllen, das doch vns nit
beweisst, wir auch von ihren keinern deshalben Jemallen
gebrucht noch von niemandem Klag noch mangel gehört
Sunder sich in der gemeindt, still vnd burgerlichen gehalten, das
wir ohne Klag von Innen allen alwegen gewesen und auch nach
Demnach sindt genanten gefangenen weyber kinder vnd freündt¬
schafft, zu uns kommen, und uns umb ein freyschreifft und
bericht an E. v. dienstlichen gebetten, darmit sie der gefang¬
enschafft endtlediget, vnd wiederumb zu ihre Armen weyb vndt
Kindern kommen mögen vnd mehren [vnnser verhüettet]
Wan dan als bemelten wie [biz ]ihren keinem Klag
mangel, nach viel weniger beweisst, das sie mit ungerechten
sachen umganngen, sunder sich burgerlichen gebruchen lassen
So gelangt und ist hirauff an E. v. vnser vnderthenigs
Pieten, E. v. Wellendt hochgedachten vnsern gnedigen fürsten
Vnd herren gnedig berichten, auch ihr fürstlichen gnaden vmb erlassung
der gefanngenschafft Pitten darmit sie wiederumb zuo
ihren Armen weyb vnd kindern (die sich so wol tags
als nachts flehenlichen übel gehaben) können mögen.
Das stat uns vmb E. v. in Aller vnderthenigkheit zu
verdiennen, E. v. dem Almechtigen in gesundtheit wol¬

befellendt, Datum Schliengen den 12ten Aprillis Anno 1602.
E. v.
vnderthenige
vögt zu Schliengen vnd Steinenstat
auch [zwölffe ]und [geschworne ]sampt
gantzer gemeinde

Dem Edlen unndt vesten Hanns Christoffen
Schenckhen von Castell obervogt der herrschafft
Bierseckh unserem gnedigen fürsten
und gebiettenden Junckhern