S.1

1602. 12. apr.
Edler Vester, freündtlicher, günstiger Lieber schwager vnd
günstiger
Junckher
Eüch seyndt unsere freündtliche, gantz guotwillige, dienst undt
gruoss bevor etc. Demnach Ihr Claus, Hanns, vnd Walter
die Metzger +
+ der Vatter vnd 2 Sün
von Steinenstat, auf befelch unsers gnedigen
fürsten vndt Herren, Herren Bischoffen zu Basel, In gefangen-
schafft genomen, ursachen sie bey ihr fürstlichen gnaden ver¬
klagt sein söllen, alles ob sie mit vngerechten sachen ihrer
Artzney vnd Künßten umbgehen sollen etc. Demnach seindt heütigs
tags bemelter gefangener freündtschafft vnd verwante zu
vns kommen und vns vmb bericht, vnd fürgeschrifft
(ihres vnsers wüssens) an eüch gantz vnder dienstlichen ange¬
suocht vnd gebetten, Wan dan ich der pfahrherr Hanneß
Metzgern vor Neün Jahren vnd seidherr etliche mallen solcher
Sachen halben in der confession starckht examiert vnd befragt,
Ich aber, der Zauberey vnd Wahrsagney halben nichts bey Ime
erkhundigen nach spüren könnde. Wie wir bedt sonst
von allen dreyen personnen, sollicher sachen halber, das sie mit
ungrechten sachen vmbgehen söllen, wir niemallen gehört
nach vns dessen wüssen, Sunder das sie nur mit Artzney
sich gebruchen lassen. Vnd sich vnder der gemeindt fein
still vnd bürgerlichen gehalten, Wan dan moege unter
armen gefangner weyber und kinder, sich flehenlichen übel
gehaben, vnd vns vmb fürpitt an eüch gantz flehenlichen
gebeten. Gelangt demnach vnd hieruff an Eüch
vnser freündt: schwägerlichs vnd dienstlichs Pitten, ihr wel¬
lendt hochgedachten vnsern gnädigen fürsten vnd herren berüettet
gefangener halben, der sachen beschaffenheit und empfangenen
bericht so viel Mögliches mit berichten vnd ihr fürstlichen gnaden
vmb erlassung der gefangenschafft pitten, darmit sie ge-
 spüren mögen unser fürgeschrifft genossen haben. Das stet

S.2

uns vmb euch #
# den schwager und g.
Junckhern
 in anderem freündt: vnd dienstlichen zu beschulden
und zu verdiennen, Thundt eüch dem Almechtigen  got in ge¬
sundheit befellendt. Datum Schliengen den 12ten Aprillis
Anno 1602.
dess Schwagers vnd Junckheren
Dienst: vnd guottwillige
Hans Jacob Nagell von
der Aldten Schonenstein
Georgium Widergrein
 pfarherr zu Schliengen

S.3

Dem Edlen undt vesten Hanns Christoffen Schenckhen
von Castell Obervogt der herrschafft Bier-
seckh Unserem freündtlichen schwagern
und günstigen Junckhern