1577 Dorothe et Agnes Bartin et jaques Sury Vrgicht der zweyen schwestern Thorathea vnd Agnes Bartin, von Reinach. Vnd Jacob Suris von Muttenz Thurla bekantnus erstlich Item erstlich es sey heur verschinen fasten dreu Jar gsin das sey einer im schwartzen häß zu ir in die Reben khomen vnd si Petten si soll seins willens pflegen, er well Ir gnug geben das si kein mangl haben müeß, das hab si thon, vnd er hab ir ein hafen mit gelt geben, vnd hernach noch ein mal ein handtvoll, do sie heim khomen, sej das im hafen nicht denn Rosßkotth, vnd das in der hand nun laub gwesen. 2. Item wie si erstmals seins willens pflegen, Sei er von Ir gangen vnd bald wider khomen. Vnd si ermant, wenn si im volgen well, so müesse si sich Gottes vnd aller seiner heilgen verleugnen. Das hab si thun, Solchs hab er zwei mal an si gemutet, das si allwegthon. Er hab si auch ettwa hart angeredt, Wenn sie bettet vnd Ir Kind wie andere Christenleut gsegnet, vnd Irs verpotten 3. Item Si hab Christa bueglin zu Reinach sein Kue mit einem besen vnd einer Gabel schlagen, vß anstifften des Wenglis Irs Bulen, denn also hab er geheissen das si bald umbgfallen vnd gstorben 4. Item es sey wahr, Si hab des Meyers Suns Kind, gelempt, mit solchen dingen. Das kind hab sein notturfft than hab sie ein lumpen genomen, vnd ins Teufels Namen drin gspözt, vnd darnach das Kind mit gwüscht sey es erlammet, Aber si hab, schlangenkrut im mul gehept. das hab si auß Rath zweier weibr thon wie hernach stat. Vnd do aber des Kinds vatter Nota Si hat die 2 weiber wider entschlagen. 1

vnnd der Großvatter, si mit ernst vnd tröw worten ermant dem kind wider zuhelffen. Hab si Gott vnd die Mutter Gots angerüfft das si dem kind sein gsundtheit wider kheme, sei beschehen. 5 Item si hab jezt ein Jar verschinen, auß anstifften Irs bulen Wenglis mit im ein hagel gemacht. der gstalt, Si hab schlangen krut vnd Wolffkrut genomen, vnd das in einem Hafen mit Wasser gsolen beim hagendorn brunnen, vff Bruderholtz vnd si hab feur vnd wasser in hafen than vnd das us Teufels Namen, vff das erdtrich vß geworffen das sey in einer halben stund gschehen. Do sey Ir Pub mit Ir gangen biz in die Matten. Hab ir wol zugemuetet seins Willens zuthun, des si sich gwidmet. do hab er zwei Ringen mit ir thon, vnd von Ir Zogen und gsagt er wel bald wider zu Ir khomen. 6 Item si hab noch ein Hagel gmacht in Reben mit den dingen wie vor. Den hafen hab si darnach vergraben beim Carthauser ackher, in Jergen lolingers ackher beim Speckhbann neben fridli schneiders acker 7. Item Si vnnd Ir schwestern Agnes Seyen auf ein nacht auf ein besen gsessen vnd gen danzen wellen, Seyen beid auf eim besen die stiegen abgeritten. do sei ein Thier wie ein Geiß gstanden daruff si gsessen und durch den Garten hinab, fur den bach hinuß gfaren, vnd danzet Vnd der Suri sei auch bej Inen gsin, vnd einer si Inen zu dantz pfiffen, vnd ein Jettliche hab mit Irem bulen danzet, der pfyffer vnd Ir schwester bub haben Rote cleider angehept, vnd der Ir schwarze, Demnach synn si heim gangen, vnd zechet. vnd hab si und der Suri zu Oberwil in Jacob Werls huss wein geholet

4 maß. Nach der zech seyen si schlaffen gangen ein Jede mit Irem Pulen, vnd Unkauscheit triben. 8 Item der Suri sei als gut als sy, denn den nechsten hagel vor ein Jar hab er Ir helffen machen, vnd wasser im huet zutragen. Si halt auch darfur er hab Brosis Sünen Ire Rosß vmbbracht. Denn er sey vil bei vnd mit Ir gsin. 9. Item Ir Bul Wengli hab Ir zugemuetet, Si soll eff das heurig Jar, aber die frucht verderben, Si habs aber nit thun wellen, denn die frucht, so hübsch gwesen si vbel dauret. 10 Item ungever bei 6 wochen Sei Ir bub bey Ir gwesen vnnd mit Ir um gehandlet. Item Ir schwester Agnes sei eine wie si, denn si hab dem Guzwiler sein kue auch vmbbracht, mit einem stecken. den Si der Kue zwischen die harmer gschlagen das si gstorben. Nach diser bekhantnus hat si als man si wider in die fenckhnus furen wellen, mit dem Meyer von Arleßheim geredt. Er soll mern wider zu Ir khomen. Denn es seyen zwo zu Arleßheim, Ruede schmiders schwiger, das Welsch Marieli genant, vnd Jacob Lawer wib seyen auch solche wie si Und als Meyer morgen mit dem schreiber zu Ir khomen hat si anzeigt wie bede wiber auch uff ein Nacht, mit Inen vff den Egerten danzet. Seyen darnach uff ein tag gen Reinach, und Nemlich des Läwer wib zu Ir in Ir huß khamen vnd gsagt Si soll des Meyers Suns

Kind erlemen, So well si dem Thurs Kobel zu Arleßheim sein kind lemmen, das Ir hab si volpracht, vnd sei des Kobels kindt auch lamm worden. Wie si aber als der Suri gfangen worden, widerumb gleichwol bei der Rüstung ebenen  und mit der Marter, weitter gfragt worden und si anzeigt wie si, vnd Ir schwester auch der Suri +  + und die 2 weiber von Arleßheim ettlich mal vff Prattelen matten gwesen. Vnd die schwester darvor waz gfragt worden vnd von Prattelen Matten kein meldung thon, sondern auf Irer ersten bekhantnus, doch auch an verner merter beharret, Sind die schwestern beid zusamen gefurt worden. Also hat die Thorla. die schwester auf ir hoch ermennen. Vnd die zwei Weiber von Arleßheim widerumb entschlagen. vnd das si nie vff Prattelen matten kamen, noch die zwei Weiber den anschlag der kind lammung halb gemacht hatten. Sunst hat si aber auf den selb mal des mit Marter verner anzeigt. 12 Item zum besen Reitten, vnd den Zablen damit si das vich gschlagen. Hab si ein salb gemacht, vß schlangen und Wolffkrut, vnd Bibenellen das hab si under ein andern kuetten und ancken drunder gemischt, vnd demnach den besen vnd Gablen mit bestrichen. der salb soll noch im huß sein. 13 Item Si sei ettlich mal auf Brattelen matten gsin. Und der Suri auch der habe vff eim Theller zu danz gemacht, vnd der böß vff einer

Sackpfyffen, Si haben pfiffen vnd trumet, vnd allerlei farb Kleider gehept Plaw vnd Roth. 14 Item ettwa wenn si gfaren, hab si den besen oder gablen mit schlangen krut bestrichen, ins Teufels Namen. 15 Item Si bekhenn, das, Zur Zeit do man eine Amalia von Therwil verprent, Ist vor 18 Jaren gschehen, hab si ein hagel gemacht, bei Therwil Capeli vnd sey Mottschhensin von Äsch bei Ir gsin, Hab genommen Pitten Placken, Kletten, vnd Klebern Krut, oder winden in Reben, vnd in ein düßffin thon wasser vnd feür darzu, vnd es ins Teüfels Namen vßgworfen, der hagel sei vber den halben berg, gegen Reinach vnd Terwil gangen. Surj vnd Mottschensin seyen darbei gsin, vnd sunst allweg, 16 Item Hannsen frizen fraw selige so ein Kindtpetrein gwesen, vnd des Kinds gvesen. Sei si zu Ir in die stuben khomen, vnd hab die händ mit wolffskrut geriben, vnd Ir vnder die decki an die fueß griffen sei mormers gstorben. Habs ins Teufels Namen thon 17 Item Brosis Telckh zu Reinach hab si Ir Ross vmb pracht. Si hab wolffkrut genomen vnd winden in Reben, vnd das in einer schüssel zertruckt, vnnd schmär darunder thon, vnd das dem Rosß an die bein gstrichen, Vnd do si das thon sey si zum Seerstal in gestigen, damit si in stall khum. Si hab auch demnach die salb vff Irn misgeschütt ins Teufels Namen. Seyen Inen hernach noch zwei Roß vmb gfallen.

18. Item letslich. So sei der teufel erst, sambstags verschien bei ir in der fenckhnus, vnd zu Ir gsagt, sy sei sein, er well bei Ir sein. der Agnesen Vrgicht 1. Item sagt vnnd bekhent wahr sein das in der fasten 3 Jar gwes. Seye der böß zu ir komen in Mannes gestalt im Schlattholtz, hab si ein schwäre burde holtz trogen, hab er sie angeredt, frewli fröwli Ir tragend schwär, wolten Ir mir folgen Ir müessten Nit mer so schwär tragen. Das hab er ettlich mal zu Ir gseit, vnd Ir gelt Potten in eim lumpen, do hab si seins willens thon, vnd wie si heim khomen. Sei nichtz im lumpen gsin, denn Rosskoth. 2. Item si hab sich auch gleich auf sein begern desselben mals Gottes, vnd aller seinen heilgen verleugnet und ims mit worten "Ja" verheißen. 3. Item si gstand das si dem Guezwiler sein kue gschlagen vnd gworffen mit einem stecken den si uß dem hag genomen in aller Teuffel namen. das hab ir Ir pul Hans oder Hanßli geraten dem si clagt, wie Ir das vieh immer in Garten gang, vnd habend si keins, hab er gsagt er well Irs wol drus bringen vnd si heissen thun, wie vorstat. 4. Item Ir schwester Thurla, hab des Meyers Suns kind gelempt, vnd im thon wie si selb bekhent, denn si darbei gsin, vnd gsehen, das si in lumpen gspözt, vnd das kind mit gewüscht, vnd gsagt das dich Botz kranckheit an kummen, in aller Teufel namen.

5 Item Si vnnd ir bul Schwester haben sollen ein hagel machen hab si Ir Pul angewent, Si soll mit gan, do si aber nit kunden gschäfft vnd Irer kinden halb, hab er gseit. Si soll Numen den Willen drin geben so sei es gnug. das hab si thon. 6 Item Ir Bul hab ir auch geraten, vnd si heissen Haßelwurz sieden in eim hafen mit wasser, vnd das vff die gessen schutten, vnd wer druf thret, dem mueß sein theil wol werden. Si habs thun, wiß aber niemant der darwon beschedigt worden, vnnd das sei heur im frueling beschehen. 7 Item vom danzen bekhent si das si mit der schwester vff einem besen die stiegen abgeritten. do sei ein schwarzer hund gstanden. vff den si gsessen, vnd bald für den bach außhin khomen, vnd anfahen zudanzen, ein Jede mit Irem buben. Vnd der Suri sei bei Iner gsin vnd Inen zu danz gemacht, auf einem breiten stecken so geholt gwesen, vnd Ir Pul vnd der Suri habend beid gleichling cleider angehept selzamm farb, nit äschenfarb, und nit nußfarb, do si nun danzet Seyen si wider auff in gangen, vnd zehet, denn si Wein mit Inen bracht, vnd darnach ein Jede mit Irem bulen sich geleit, der Ir hat vngschaffen fueß ghan, wie ein krewel, vnd sei fast zwo stund bei Ir glegen vnd mit Ir zuschaffen gehept, also das si gemaint er well si thödten. der Suri aber sey hinweg gangen 8. Item das letste mal das er bei Ir gwesen vnd Unkeuscheit mit Ir triben, Sei zwischen Ostern vnd Pfingsten gwese diz Jars. Nota Diser artickel und aber Nr. 7. ist ein artickel Item si gstande des Zehens das si mit einandern thun, da man den wein zu Oberwiler geholet.

9. Vnnd zum letsten sei wahr, das ir bul vnd Ir schwester si offt ermant, si soll mit Inen uff Prattelen matten faren. Si sei aber nit druff khumen denn sis nit schicken künden, von Irs Manns vnd der kindern wegen, vnd vff ein mal seite Ir Pul zu Ir si müest mit Inen, das schlueg si aber ab, von gschäfft wegen Irer vil kinder Denn wenn si hin weg wollen hab si Ir Mann vbel geschlagen vnd gsagt si mueß vff Inn warten. Die aber habend si triben, wenn si Nummen den willen drin geb das hab si thun, vnds Irem Puben mit der Hand verheissen. das sey offt geschehen. 10. Sunst in der nachfrag, wie wol nit peinlich hat si nicht anderst denn diz vnd daz Ire schwester ein salb habe, damit si den besen gschmirbt, do si die stiegen abgfaren. Die salb soll vnderm dach ston, Wen si nit anderswo si. bekhent. Jacob Suris von Muttenz Vrgicht. den 3en Septembris Anno 77 Examiniert Vor mittag. Am abent bewurts 3. Septembris ist der Suri Peinlich, allein ein mal ploß außzogen, vnd do er nicht bekhennen, an dem Poden geschraufft vnd ein wenig doch zimlich außzogen worden. hat er frist begert sich zubedencken, das im zuglassen biz auf heut wie obsteet, hat also on alle pein bekhant und gsagt wie volgt. 1 Item vor 30 Jaren sej er zu Terwiler bej einer wittfrawen dienstweiß gwesen hab die

Muffini geheissen die man hernach verprent. Bei dero sei er darhinder khomen, vnd erstmals mit Ir zum Capeli brunnen gfaren, vff einem thier sei gwesen wie ein grosse kaz. Vnd wie si dahin khamen, fyel er als ob er ab ein stekh firt, hab auch des fals wol 14 tag empfunden. Aldo hab si ettwas in eim häfels ghan, vnd das mit einer Putten zogen, do sei ettwas vß dem hafen gangen wie ein Rauch oder Nebel, vnd ein Hagen drus worden gar groß, vnd si hab Inn mit der Rutten gegen dernach hinuber gwisen, Sei also gangen. 2. Item wie si aber erstlich dahin komen, Da keme der böß in Mannes gestalt daher, wol kleidt vnd ansehenlich der spräche zu Ire, was hastu darfur ein Kunden. Sagte si, er will auch vnser einer sin, vnd vns dienen, Do heb er Inn angnomen, vnd im verheissen, wenn er im dienen und volgen well, so well er im gnug geben, er well im aber nümet geben, er verheiss im denn, das er Nimmer an Gott dencken noch etwas in sein Namen anfahen will, das hab er thon darauf er im vil gelt geben, als er vermeint, Es sei aber nichtz dann Rossdung gwese Seyen Darnach wider also wie vor heim gfaren. Der Müffinen gspan hab Beelzebockh, vnd seiner Rebhannschli geheissen. 3. Item bald darnach füre er abermal mit derselben müffinen gen Äsch auf ainem ding wie ein stul, vnd sagt huy das gang, da kemen si bald gen Äsch in BlindHeinishuß, des wib auch eine war, Aldo si mit einandern truncken. Do hett in der T. aber angenomen wievor vnd im gelt geben, wer aber nichts den Rosskh. etc. aber im anschowen hett einen verschworen es wer lutter gut gelt.

4. Item er sei mengmal auf Brattelen matten gsin do sey ein dürrer baum, vnd ein Ring drumb, Aldo die alten Nemlich die Muffini Amalia, Blindheinis frow (so alle verprent) Vnd Jetziger Zeit q q noch in leben nemlich die Mattschhensin zu Dugkhingen in pfeffinger ampt, vnd die Margreth von Metzerlen, vnd die gefangne Tharla ettlich mal gwesen, denen hab er win gholet in dorff Brattelen. Do si denn vnder dem Baum Danzet, vnd allerlei gut leben ghon, Sei denn Jetlichs wider heim gfaren wie es khomen vnd das erst bei 3 Jaren 5 Item er bekhenn, das er dem Thurle, denn dieselb sei rechte gspil gwesen, vnd seine schwester zu Reinach, auf den wisen zu danz gemacht, auf einem stecken. sei hel gwesen vnd dafornen ein pfyffer dren wie an einer sackhpfyffen. Dabei auch die Mottschhensin gewesen, Vnd dar noch mit Inen zechet, Sy seyen auch ein Jede mit Irem Pulen schlaffen gangen, vnd er mit seiner vßhin vnder ein Paum, vnd demnach wunderbarlich wider heim gforen vff einem besen, Do der böß da fornen vnd er hinder im gsessen. seyen eh denn einen möcht ein Ey essen daheim gsin. 6. Item er bekenn das er dem Thorli hab helffen ein Hagel machen bey dem Hagendorn brunnen vff Bruderholtz, da hab si ein hafen mit krut gehan, aber kein Feur anders denn wie ein Wetterleich, vnd er hab Ir wasser geholet in seim Hut, vnd wenn si drin gestochen hab mit ein steckli oder Ruten, So hab es nit anders thun, denn wenn vil grosse hurnussen wumsen, vnd wie ein grosse windts prut vnd als obs alles vß der Wurzen reissen well. Und sej demnach 10

der Hafen zersprungen. Das man kein scherben me hett finden mögen. 7. Item auf ein Zeit (weil im der böß kein Ruw glassen) hab er allein beim hagendorn brunnen ein Hagel machen wollen. Wolt im der nit geraten, da hatte in der Teufel, mit eim grossen Jegendorn stecken an grind gschlagen, daz er vmbtrümelt war, Jedoch sei ein Regen worden vnd sein gfallen wie Bonen. 8 Item bei 4 Wochen allernechst, Sei der böß in weibs gstalt zu im komen zu Oberwilr im werd, hinder heini Fyrtags huß in des mullers matten. Hab schöne cleider angehept, ein Roten rock, weisse schuhen vnd vberauß weisse bein, vnd hübsch brüst, da hab er mit Ir zu schaffen gehept vnder eim wydenstockh Sei an einem donstag zunacht gschehen, do hab er Ir muessen verheissen, das niemandts zusagen das hab er than. Vnd do si von im wellen, habs ein schrei glassen wie ein Ochs, vnd ein Crepitum hab mechtig vbel gstuncken. 9 Item bald darnach sei er von Muttenz gangen, wol begecht. Sei si aber zu im khomen zwischen Bottmingen vnd Oberwiler Bann, hab er ghiuchtzet und gschruowen. So si vß eim gehürsch mit Ruschen komen. vnd zu im gsagt Ich bin dir zunechst mal zu willen worden, vnd du hast mir gehalten. Ich will dir aber zu willen werden. Doch sags

niemandt anderst Ich zerzerte vnd zerrisse dich da hab er Irs aber verheissen. vnd uber so gesch gewüscht geschwindt. 10 Item heurigs Jars zu vßgend dem Aprellen, do die Kriese plüeet, hab er ein hagel gemacht, vnd kruet genomen hab ein gäli plumen, vnd es in ein hafen than, vnd ein wenig wasser drin. Sei es worden wie lym, vnd uss dem hafen allgemach gangen, vnd sei ein hagel worden. 11 Item das gefangen Thurli sein gespil, hab im ein salb geben. Die hab er Bresis Sünen an ein Roß sei ein Brun gsin, gestrichen sei es bald gstorben. Vnd er sei heimlich bei nacht in stall gstigen. Die ursach, der Thurß hab im wellen schlagen darumb hab ers thon, vnd sei ettwa .9. oder 10 wochen sider. 12 Item die Mattschhensin zu Duckhingen, hab dem Kobel von Arleßheim sein kind glempt, Sei Jetz ein jar vnd 5 Wochen. Vrsach seins wissens Er solt zu Ir khomen sein, aber zu spat, darnach were er von Asch gangen. Kem si zu im uff dem weg und sagte, Si hett aber ein duckh thon, und dem kobel sein kind glempt. Und er solt ir geholffen han, 13 Item Margreth von Meigerlen, Sei ungever vor 9 Wochen zu Im khomen, vnd im bevelchen das

er auf ein Sambstag zu Ir zum Schlattbrunnen komen solt, das hab er thon. Und sei er und sein gspan Rebhanschli mit im geritten, auf einem Thier, hett lange Ohren wie ein Esel. Da funden so den besten wein, den er sein lebenlang nit nie truncken vnd fleisch, vnd kein brot, hetten gar gut leben, vnd Ir faßnacht, wüschte sein gspan oder gsell über die Margreth, vnd er vber Inn, wer gleich auch ein weib wie si vnd triben muttwill. furen demnach wider hinweg. 14 Item am anderen sambstag kam er wider dahin, hatten aber mit einandern zuschaffen. Vnd füren gen Grellingen. Do geb im die Margreth ein stöckhen der voller graß umbwickelt. Redte der Teufel zu Im er soll das Roß schlahen, vff der weid, vnd si sagte schlag ins Teuffels Namen, das thut er vnd das Roß sturbe gleich, Wiß nit wie der pur heisse. 15 Item er vnnd das gfangen Dorli habend erst recht wollen zusamen schweren. Das hab im der Teufel befolen vnd geraten, vnd si muessend erst vil mit einander anfahen. 16. Item an Therwiler nach kilwi, bei acht tagen hab der Teufel im gsagt wie seine gspilen gfangen ligen hab er sich clagt wie er Jetz keine gspilen me hab. hab der T. Im zu antwurt geben Du hast noch die Menschhensin, vnd die Margreten von Mezerlen. Biz well wir ander mer uber khomen.

17 Item den alten algemelten weiber, so eins theils gstorben vnd verprent seyen, hab er zu vilen dingen geholffen denn si seine Pursentinei gewesen. Nach mittag hat er bekhent abermals an Marter. 18 Item bei .6. Jaren hab er mit der Margrethen von Mezerlen, ein hagel gemacht, zwischen Flieh und Bettwil oben, 19 Item in anfang seiner annemung, hab er sich gegen dem Teufel verloben müessen, das er weder Gott noch seine heilgen mer anrueffen vnd sich Ir verzeihen welle, das habe thon, do hab er ettwas zu lon gefordet hab er im gelt geben vil wie er gemeint, Sei aber nichtz denn .3. helbling gsin, denn sovil hab ein Jude all wochen zulen, Die 3 Helbling hab er der Muffinen geben. Hab si gseit si well ein Geiß drumb kauffen. Darnach hab si dem Petter Reber zu Terwil sein Geiß genomen Sey si und Suri, druffgeriten vnd aber zusamen komen. Sagte der Beltzebockh zu Ir wo si die .3. Helbling hett, und wie si sagt si hatt ein geiß drumb kaufft, da schlug er si, vnd geb im die 3 helbling wider. Do er sich aber claget es wer nit gnug, hieß er Inn Wein haben zu Leimen, das thett er, vnd füren zum Brünli gen Bottmingen, vnd zachen da. Si hatten aber die Geiß geriten das si gstorben

20 Item zu Buel hab er ein Mal welsch Peters weib gar ubel gschlagen mit einem stock so im der T. geben, und wie si Im fragt warumb so Ir er si also schlug, sagte zu Ir, darumb das si dem und dem nit volgen wett. Do hette Ir Mann Inn auch gefragt, der denn si sich kranckh gelegt, warumb er sein weib also gschlagen, hab er inns sey anzeigt. Und das weib wer in 14 tagen gstorben. 21 Item die Müffini hett ein Mann hernach genomen weitern Muttenz, hiesse Gastackherman, der hett auf ein Sun Hans genant hett ein hägerli denen beiden hab er mit einem trankh so im die Müffini geben, vergeben, aber alles uß Irem geheiß, dem vatter zu erst, und darnach dem Sun, der Vatter sturb in Zweyen, vnd der Sun darnach in 4 tagen. 22 Item in disen dingen wer er von Muttenz gen Therwil gangen. Do hett in der T. in ein dicke hagken geworffen wer die Müffinnen bald da, der Beltzebockh uber si mit Unkhenscheit. Geben im bevelch die trunckhen daheim under dem Pett ze heben vnd es denen zebringen weren auch bald daheimen 23. Item dem Mathis Neuwer hab er ein schelmen bein das im die Müffini geben. vnder die stall thur vergraben. Sei im ein Roß gstorben das sei beschehen, das er Ir kein holz fueren wellen

15

Er hab Inn gewarnet er soll Je füren oder es werd im leid werden. Der T. were domalen bey Ir in der stube. wie er das vßrichten müssen. 24 Item noch auf ein mal do hette die selb Müffini geancket, unnd plotzet mit dem ancken kubel, fast hin und hör, da kam ein ungeheurer lufft und ein thaßen, und lüffe der T. umb das hus herumb, und kündte nit hinein khomen, also kem er zu eim kleinen loch hinein, do wer ein lufft an die Magt gangen, das si beim herd in der küchli under gfallen, und bald darnach gstorben wer. Er hett aber der Müffinei zu disen dingen geholffen. 25 Item er hab Hans Walhen fraw auch thödt, und ir auß heissen des T. ein menschen bein vff dem kilchhof geholet, und es der frauwen under das Pett geleit. Und wie er das bein geholet, hat er Nummen ab dero Kilchhoff, khomen khünden Biz in der T. fragt ob er eins hatte, da sagte er Ja, vnd wa er keins gehept hett, es wer sein ubel von Im gewartet worden. 26 Item mit des Numenmachers seligen weib, zu Oberwil, leb auch nit mer, hab er auch gmeinschafft ghon denn si auch eine gwest. Do seyen si ein mal im stallen, also heiß das selbe, zusammen

khomen. Die hab in heissen ein schelmen bein nemen. Und habend uß ettlichen krütter, die er wol kenne aber nit nennen künd ein salb gemacht, und das bein und die salb, under Heini gürtlers stall thür vergraben. Sei im ein Roß gstorben. Da hab Inn der Gürtler petten, und sein Rath ghan, wer es thon, und wie er im wider f, das hab er im anzeigt und im heissen im stall graben, damit Im die andern Roß nit auch umbkhomindt. Er habs aber an des T. vorwißen nit thun khünden. Doch so hab er von Teüfel vil leiden müessen das ers anzeigt hab,

27 Item die selb Numenmacherin und er hattend ein Mal aber solche krütter gneumen, und ein essen gemacht, das man essen khünden were der T bei Inen vnd geschehe beim Neuwen brunnen wie man gen Liechtstal get, da kam ein Pur von Fulistorff der esse auch mit Inen, mit dem wurd er vneins und schlugen mit einandern. Morndes kam ein ander Pur der clagte Im wie sich der so vbel gehuebe, so mit Im gessen, leg gar zu Pett und Püte Inn er solt zu im khomen, er welt Im ettwas schencken. Da kame er zu im und geb im der speiß wider mit Wein gemengt, das trib Inn dermassen das im der Neßel an hosen zersprungen wer, und wurde wider gsund. Sunst wist et wol wer dasselben dings, das sie gemacht esse der mueß sterben.

28 Item am tag wie er gefangen worden, und von Basel Heim gangen, Sey sein gspan der Rebhanßly zu Im komen uff in weg, vnd Inn gewarnet, er soll mit Im gon, sunst werd er gfangen. Si wellen me bulen suchen 29 Item Agta Hudleren von Muttenz sei auch eini, denn er hab si sehen mit dem Belzebockh zu schaffen han. 30. Item Steffa Puren selgen wib zu Oberwil noch in leben, sei auch eini heiß Nesa. Denn si hab im ein mal die Seuwen gestelt, das er si nit ins dorff pringen künden, vnd wer ein gross wetter, da kam si uss im holtz vnd lüff daher ungestumlich.

Dise zwo schwestern vnnd der Suri, seindt vff den 11 Septembris zu Arlaßheim, fur das Malafizrecht, gestelt, beclagt, vnd auff Ir bekhennen, zum feur verurtheilt worden Anno 77

Vrgicht zu Rinach. zweyer vnholden, vnd eins Hexenmans de Anno 77.