[S.1]

1610. 11. aug. Hochwürdiger Fürst Gnediger Herr Eüweren Fürstlichen Gnaden seyen Vnser Vnderthenig gehorsahme dienst. Yederzeyt bevohr, Vnns zweyfelt nit E. F. g. oder doch derselben herren OberAmbt Leuth, werden noch gnedigen eingedenkhens sein. Was gestalten, vor vngefahr zwölff oder Vierzehen Jahren, Jehanne, Vnsers Weybels zue Goldenfels, Hausfrauw, von wegen Sy der Zauberey vnd Hexerey verschreyt vnd angegeben geweßt, in E. f. g. gefangenschafft, eingezogen worden seye, Demnach aber sich damaln befunden, Das Sy Schwangers Leibs Vnd vmb deßwillen nüt langer gefangenschafft, nit vfzuhalten Vyl weniger aber, an die Tortur, zuschlagen seye, Hatt man Sy fur selbiges mahl. widerumb Lauffen Lassen, vnd hieut zwüschen zusehen wöllen, Wie sie sich furtter verhaltten vnd betragen wurde. Wann aber Gnediger Fürst vnd Herr, ermeltte Jehanne, sich ab solchem nit gebessert, besonder Sy vnd Ire gespylen, alß Annelin, Jehan Belmoys, auch van Guldenfels weyb vnnd  Jehanne, Jehan Quelains des alten Weyb,  sich darseider nur ye lenger ye ärger, mit beschädigung Vnser vnd anderer Irer benachbarten, an Vych vnd anderen anmuetlin, bezaigen. Darzu Sy sich selbsten, vnder einanden, offentlichen berüchtigen, allerhandt verweisen vnnd vorwerffen alß du Menschen fresserin, die Schafffresserin. Du Ochsen, vnd Khuefresserin etc. Item weistu wie du an dem und Jenem orth einen Hagel gemacht. Vnnd waz dergleichen mehr. Zu deme Ich mit Supplicant, Johan Quelain, auf ein Zeyt, die gedacht Annelin, freundtlichen angeredt vnd Verwahrnet. Wie das

[S.2]

Ich vernommen, Sy seye fur ein Zauberin angegeben, Vnnd man seye willens Sie gefenkhlichen einzuziehen, hatt Sy mir auf solches khein andere Antwurt geben, dan, So fe man Sie einziehen wölle, muesse man auch deß weibels weib, die obgenante Jehanne, einziehen vnd begreiffen, dan Sie wüsse vnd khönde vyl mehr dan Sie Annelin. So befinden wir Arme Leuth auch, den Jezt etliche Jahr hero, Vnnd aldieweyl diese böse Leuth alß berüchtiget seyen, nichts dan alles Vnglükh bey Vns droben zu Goldenfels. Bald mit Hagel, bald mit feur vnd brandt dienen dz Wätter Bald mit hinsterben Vnsers Viehs vnnd Rossen. Wie dan mir mit Supplicanten Heinrichen Wittet, Jezt von etlich Jahres hero, fur mehr dan Thausendt pfundt Vich vnd Rossen, hingestorben vnd verdarben seyen. Item darseider Ich Jehan Quelain obgenant, etliche guetter (zu welchen der Weybel einen lust zu khauffen gehabt) an mich gezogen vnd khäuflichen bracht, Ist mir nit allein alßbald daruf, vnd vf beschehene beträuwung seines Weibs, mehrgedachtes Jehanne, ein Schöner Ochs, Vnfürsehens abgangen, sondern Jezt abermalen ist mir ein Roß krankh worden, Vnd särbt auß, also dz nichts, dan allein haut vnd bein, Salva reverentia, daran mehr ist + + So hat auch die besagte Annelin, berurtter Jehanne, deß alten Quelains frauw, vnderschiedlichen gesagt vnd verwiesen, Sie habe Mir Noel Mouhain, mein Roß nit zusterben machen wie Sie Jehanne etc. So seyen die berurtte Weyber auch also gemainlich verschräyt, Das meniglichen Inen solche Ir hexerey furwürfft vnd aufrupft, Auch mit Wüssen vnd zuhören des Weibels Ires der Jehanne Mann selbsten. Vnnd würdt doch kheiner Von Inen darumben angefordert

[S.3]

Vnd vmb reparation berechtiget. Wann dan Gnediger Fürst Vnnd Herr, Vnns nit möglich, dises Vngezüfer vnd von Inen bißhero empfangnen schaden, Verner zugedulden vnd zuertragen Vnd ganz schwärlichen vns bißhero enthalten khönden, daz wir nit mit der That selbsten, solchem Vnseren schaden für khommen seyen, Also haben E. F. G. wir solches alles hiemit Vnderthenig anbringen, klagen, Vnd vmb oberkheitliches einsehen bitten wöllen, Ganz Vnderthenig flehendt, E. f. G. wöllen diß orths, rechtlicher disposition vnd Ordnung nach, fürsehung thun, Vnd vnß erzelter beschwärt entledigen vnd abhelffen. Doran thun E. f. G. Was billich vnd recht. Vnd wir sollen vnd wöllen es vmb dieselb vnderthenig gehorsamblichen gern beschulden vnd verdienen. Zu gnaden Vnns damit Vnderthenig gehorsamblich bevelhendt./ E. F. G. Vnderthenig: gehorsahme Vnderthonen Jehan Quelain der Jünger Noël Mouhay vnd Heinrich Wittet, all von Goldenfels

[S.4]

Presentatum den 11 augusti anno 610 Supplication Jehan Quelains des jüngern, Nohel Muhays, vnnd Heinrichen Wüttetz, all von Goldenfels.