1610, Oktober

10/20 Vff den 10. Octobris 1600. Alls Barbli Molet oder Schlegerin von Reyben, In deß hochwürdigen vnsers gnädigen Fürsten vnd Herren Herren Wilhelm Bischoffe zu Basels gefangenschafft In dero gnaden Schloß Erguel Inzogen, ist sie vom herren Landtvogt dasselbst, mit beystand seiner vnder Amptleütten (vff Angäben anderer Weybs Personnen, zu Büren gefangen) Peinlich examiniert worden, vnd hat Bekhent vnd verjechen wie Nachvolgt. Erstlich hat sy Bekhent wie vngfor vor zweyen Jaren Iren Wardt gesagt wie man sein Sonhn In gfangenschafft vnd darnach mit dem Schwert gericht sollt haben, vnd dasselbig zu erfrogen seye sie von Büren gen Rütte zogen. In grossen Thrübsäligkheyt, vnderwägen Befandt sie ein andere frauw genampt Vrselle Papst von Büren, vnd bey iren ein Man mit grüen bekhleydt, sie vermeint es were der Amman von Rütte, dise Vrsel überrodt sie, sich disem Man zu ergäben, vnd Gott verleügnen, er wolle sy Reych gnug Machen, daruff sie sein Nammen befrogt, er geanthwortet er heyß Schwartz Hänßli Demnach sie sich im ergäben wollt er gleich mit Iren schaffen haben, vnd Hullff gemelte Vrsell darzuo, aber sie hat sich gsägnet vnd ist Allso von Iren verschwunden. Mornderigs Tags zog sie noch Mahlen von Büren gen Rütte zu, da Bekham Iren Abermals derselbigen Man Iren Meyster Im Wüsch höltzli vnd heyst sie Wilkhum sein, da nam er sie vnd hatt mit Iren schaffen ghapt, Darnach do sie widerumb von Rütte heim zogen selbigen tags

kham nochmahlen gesagt Ir Meyster zu Iren bein syechen huß vnd hat mit Iren schaffen ghabt Do gab er Iren Gelt,, gäben vnd gesagt es were ein Cronen, ist aber Nutzit anders dan Buchis Laub gewesen Weytters hatt Bekhent sie were, mit sampt Iren gspillen Mit Nammen, Vrsell Bapst vnd sein Dochter, die Anckhen Maninen von Bürren, Ellse Buetinger, Sem Säniss Weyb, Anne Mösch Adelheyt Im Fryen Hoff, die Bänne, Anne Velti, alle Vß Ires Meysters geheyß vff Reyben Veld, vnd In die Ryederen gangen Vnd hatten Schwartz sömen, so Inen Ir Meyster gäben dasselbig vff die Weyden geseyt (doch Vrsel Bapst sein dochter vnd Anckhen Maninen haben dasselbig gethon) daruff aber seye In der Nacht ein vngwitter mit Rägen gfallen, das hebs alles Dannen gwäschen Item Bekhent sie vnd Iren gspillen vorgemäld die seyen vß geheyß Ires Meysters zum dritten Mahl, Namlich ein Mahl bey der Lüschentten ein ander Mahl Im Reyben Veld, das dritt Mahl bim Allt Wasser haben gangen, vnd haben Mitt Rutten so jnen Ir Meyster gäben Ins Wasser gschlagen, damit vermeint hagell zu machen seye aber Alles zu Wasser gfallen vnd hat khein schaden gethon.

Volget Adelheyt Im Fryen hoffs vergicht die vff vorgeschribnen tag hatt Bekhent Wie Nachvolgt. Erstlich Bekhent wie vngfor vor zweyen Joren Alls sie etlicher Massen Betrüebt gwesen, seye vor Iren ein Man erschinen, genampt wie er sagt Henßly Sprach sie an sie solte sich Im ergäben, vnd Gott verleügnen, wolte er Iren Geltz gnug gäben, so hat sie sich von Im überreden Lossen, vnd hat sein begären gethon, vnd seinem Schöpffer verleügnet, daruff er + + mit Iren zum andermahln Schaffen gehapt, sie hatt von Im Somen vnd Selby empfangen Vnd mit Iren gspillen hievorgenampt den Somen vff dem Reyben Veld, In die Rüttern, vnd Im Galgen Vällt gseyt, Daruff ist aber ein gross vngwitter mit Rägen gfallen die selbige Nacht so alles abgwüscht habe, vnd ist khem schaden daruff ervolgt. Item sein selby hab sie einem Roß auch zweyen khüeyen am Khopff angsalbet, die daruff gstorben vnd abgangen sindt. Item hatt Bekhent wan sie vnd Ire gspillen handt sollen zusammen khommen sindt sie vff einem angsalbten Stäckhen gfaren nach Ires Meysters geheyß Letlich Bekhent sie Ir Meyster seye dise vergangne Nacht zu Iren Im Thurn khommen, vnd hefftig Treüwt wie sie Bekhantlich sie, wollte er sie erwürgen vnd hat mit Iren wöllen zuschaffen haben sie hab Ims aber nit gstatten wöllen, Bäthe derhalben man solt sich wachen vnd vhüetten Vßzogen vß dem Criminalischen Buch zu Erguell. Beynon

Vergicht Barbli Molletz vnd Adelheyt Im Fryen Hoff so im Schloß Erguell gfangen Ligen