Alls dan Uli Schumacher uss bernbiett bürtig

wonhafft zuo Münster in ergow, in myner g.h.

fenckng komen, von wägen das er gerett die

eydtgnossen sygent in Franckrych zu Plawylen

by Paris an der schlacht all gflohen, und der

obrist houptman Gebhardt Tamman syg schuldig

das sy so wytt für hin zogen, und er [am Rand: Uli Schumacher] syge

ouch gflochen ... Alls aber er in fenckng

gerret er syg voll wyns gsyn und nit

gwüst was er geredt, und gnad begertt

alls aber der obrist Ludwig Pfiffer Hanns

Tamman und ander eren houptlüt und kriegs

lütt disen Uli Schumacher zu berechten

begärt und vermeint diser Uli Schumacher

syg ouch der gsellten die so schandtlich

gflochen sind, so ist erkent durch min

g h schulths rätt und hundert, wyl

mencklicher weis das zu Blawylen in

Franckrych by Paris, die eydtgnossen die

schlacht so ritterlich gethan und erobrett wie-

wol vil von inen gflochen, so sölle diser

Uli Schumacher darstan und ein eydt zu Gott

und den hellgen schwerren das er dem obersten

houptman Gebhardt Tamman seligen und allen

eydtgnossen die an der schlacht so ritter-

lich gestritten mit synen worten zekurtz gwallt

und unrecht than und [am Rand: schantzlich lasterlich anglogen habe] von inen auch nüt wüsse den

von eren biderben lütten und redlichen ritterliche

kriegslütten, wyl dan er alle die so diss

mag berüren so schantlich anglogen so sölle

(2)

Uli Schumacher angents mit synen kinden uss

myner g h statt gricht und biett und allen

iren emptern schwerren darin er niemer mer

kon soll ouch den kosten mit im uffglouffen

bsalen, actum mitwoch nach petri und pauli 1564