Wir der schultheis und rat der statt Lucernn

tuondt kundt mencklichem mit disem brieff,

das uff den tag syns dattums unser rats richter

uff unser willigun, nach unser statt bruch recht

und gwonheytt volgende kuntschafft uff und ingnomen.

Allso hatt bezügt Othmar Iten, das er gezüg,

by und mit gsyn syge, alls die nüwen knecht

iüngst hievor in Franckrych zogen und zwo

tag reysen von Orliens kon, daselbst Caspar Bletz

gsyn, dem by den nüwen knechtten zweo fürbüchsen

füstling uss Tütschlandt kon, und hette er vorhin

auch eyne, rette Jacob Schnyder zuo Caspar Bletzen,

er sölltte im under den dryen eyne zuo kouffen gen.

Allso gebe Caspar Bletz im die so er vorhin ghan

und nit der nüwen eyne, und alls sy dem nach uff

der strass wärent rette Caspar Bletz zuo im gezügen

ich han min büchss verkoufft rette er gezüg ir hand

aber das horn noch, rette Caspar das horn han ich

im nit darzuo wellen gen dan er findt wol ein

horn zuo kouffen und alls sy gan cleinen Orlients

kement. Daselbst käme Gabriel Bommer

zuo Casparn Bletz rette zuo im, üwer knecht hett da

ein schwert an der sytten, da han ich ouch eins das

ist mir zuo schwär ich wellt gern mit üch thuschen,

antwortte Caspar Bletz was heüschendt ir nach, da

hiesche Gabriel Bommer sechsthalbe kronen nach,

da bütte Caspar Bletz im fünff kronen, so Gabriel

Bommer die fünff kronen an Jacoben Schnyder syn

schwager wellte inzien. Daruf bsinte sich

Gabriel Bommer ein wyl rette demnach ia, legte

syn schwert uff den tisch und neme das schwert

so er bgärt hatt und gienge hinweg. Alls aber

demnach Caspar Bletz zuo Paris gstorben, und der gezüg

(2)

von Paris gan Maison, zum fendrich Am Leen gritten allding

uffzeichnen lassen, und fendrich Am Leen Caspar Bletzen rossen

eins koufft, keme Gabriel Bommer zuge vom fendrich

Am Leen, die fünff kronen in, so er vom Jacob Schnyder

wie obstadt inzien söllen, rette er gezüg zuo Gabrielen

Bommer, die fünft kronen sollten ir vom Jacob Schnyder

üwerem schwager inzien, so ziend irs da in das

syge im zügen zu wüssen.

So bezügt Wendell Bysling unsers grossen rats, alls

Caspar Bletzen, er gezüg, und ander eydtgnossen etlichs zuo Blois

gsyn, sygent fendrich Fern und Jacob Schnyder zuo inen

auch darkon, und alls in Caspar Bletzen gmach ander

wand hangette zwey büchsen horn, rette Jacob Schnyder

zuo Caspar Bletzen, der hornen will ich eins nen, rette

Caspar Bletz nein, die bin ich kein horn zgen schuldig

aber das sonst darzuo ghördt das ich dir gen han, ich

dir verheissen aber kein hornn, dir wellt ich das hornn

nit umb ein kronen gen, und alls Caspar Bletz kranck

were, gienge er gezüg mit fendrich Ferren und Jacoben

Schnyder gan zmorgen essen, da Jacob Schnyder nüt wytters

gheüschen. Nach demnach zuo Maison ouch, und gebe Jacob

Schnyder Josten Türig die büchs neme die darnach wider,

und habe, alls sy urlob ghan, Jacob Schnyder die büchs

ann synem sattelbogen gfürt das syge im zügen wol zuo

wüssen. Sodann diese kuntschafft nach form rechttens

uff und ingnomen, so hand wir den begerenden disen

brieff under unser statt sterett insigell bewardt geben

lassen uff donstag nach dem helgen pfingstag von

Cristi Jesu unsers lieben herren geburtt gezallt fünff-

zechen hundert sechzig und vier iare.

(3) [Neues Dokument]

Uff andingen frow Elsbet Martin und gebott herren

ratsrichters, so hett bezügt Wendell Byslig und Othmar

iten, uff donstag nach pfingsten ann 1564

[Aussagen identischen Inhalts]